中門大開：山寨幫閒副局長

中門大開：山寨幫閒副局長
添馬男
http://hk.apple.nextmedia.com/financeestate/art/20130927/18440362
■繼黃錦星（左）、吳克儉（右）後，又多位石頭爆出嚟嘅問責官員，問你死未。 

梁敬國係乜水？昨日政界中人你問我，我問你，都冇人識呢位月薪18萬元嘅新上任商務及經濟發展局副局長。繼吳克儉、黃錦星後，又一位石頭爆出嚟嘅問責局長，問你死未。如果我係商務局常任秘書長黃灝玄會點諗？一位來自建造業議會工人註冊總監，稍為似樣嘅法定機構揸fit人都未做過，仲係通過一個無厘頭遴選程序，要成一年時間，先至拍板請呢位梁副局？政務官心裏只有一個「X」字。

東拼西湊　如同山寨手機
呢位梁副局奇特之處，竟然以自己沒任何政治聯繫為賣點，問責局長負責乃政治工作，台前向公眾、傳媒、政黨、議會推銷政策，請條全無相關政治歷練嘅蛋散做乜？其荒謬程度猶如捧一個五音不全懶音人做歌星。
問責制當初推出，表面理據係補公務員不足，公務員專注政策制訂，問責官員專注政治游說及推銷。老董年代班問責官員都算似模似樣，至少有相當公職及公務歷練，到曾蔭權年代，擴大問責制，新上場副局已開始出事，蘇錦樑、潘潔、許曉暉已被質疑，常任秘書長當班副局係笑片看待，「問責制」形象早已衰咗。
到梁振英一屆，新任局長除高永文稍正常外，其餘吳克儉、黃錦星、陳茂波又係一班蛋散，而陳茂波屢犯過失，死不下台，更令問責精神消失無影。
十年下來，問責制仍停留在華強北路山寨手機level，零件東拼西湊，有民建聯落選議員劉江華，又有到今日都唔知自己做緊乜嘅陳肇始教授，（大家完全唔記得陳教授係高永文副手），又有同電力公司好老友嘅陸恭蕙，成個問責制用人標準不清不楚，如果係政治工作，就定要搵有公職、傳媒、智庫、政黨相關經驗，而唔係要專才，以此標準，劉江華、陸恭蕙算合標準，但陳教授、梁敬國就唔應該請。但由於北京唔希望政黨執政，加上用人唯親，泛民黨派大多被拒諸門外，因此千揀萬揀，到頭來得到一班「幫閒庸才」。
所謂副局長淪為幫閒，因為欠缺政治歷練，上立法會panel都會成日噏錯，城市論壇都唔敢去，去到都係讀新聞稿，表現連一個政務官staff grade C都不如，要政務官扶住先識學行，仲要攞18萬元人工！最後常秘就會將無可無不可，做錯也冇後果嘅工作分派畀副局，就係專做三四線團體嘅主禮活動嘉賓，一線團體及建制派大show，當然留畀局長，因為局長都要攞sound bite，搶民望。
一國兩制、港人治港，十幾年已淪落為華強北山寨機水平！

添馬男

職位懸空兩年　梁敬國任副商經局長
http://hk.apple.nextmedia.com/news/art/20130926/18438618
【本報訊】受「跳船」問題困擾的梁班子，昨突宣佈有人「上船」。商務及經濟發展局副局長一職懸空逾兩年，政府昨宣佈任命梁敬國出任，下月16日履新。梁昨在局長蘇錦樑陪同下露面，回答記者提問表現淡定，惟內容空洞。

承諾服務至任期屆滿
梁敬國加入政府前，曾任建造業議會工人註冊總監，之前在貿易發展局工作15年。蘇錦樑指梁是他向聘任委員會推薦的唯一人選。他拒透露多少人申請副局長一職。梁稱自己無政黨背景，上任後盼能盡快掌握新工作。他說過去經常與貿易、製造業、服務業聯繫，尤其是中小企，了解他們的需要，相信自己的工作經驗有助推廣商經局事務。
被問到何以願意此時走入「熱廚房」，而近月三名政治助理先後請辭，其中兩人都以照顧家人為由辭職，他的家人情況又如何？他反覆稱加入政府是希望貢獻一己所長、服務社會，並承諾服務至任期屆滿。有記者即場問他對本港面對上海自由貿易區的挑戰，及對發出免費電視牌照的意見，他一律以「暫時未曾上任」為由推卻回應，表示待上任後與局內同事了解細節，再行討論。
梁於聖士提反書院讀中一至中七，88年畢業於中大政治與行政學系獲社會科學學士。88至90年曾在國泰航空任見習行政人員，90年於香港大學修讀城市規劃理學碩士課程，93年畢業後至98年間，梁任職貿發局服務業拓展經理，曾被派駐該局位於深圳及紐約的辦事處任主管。08年至12年間出任建造業工人註冊管理局行政總裁，該局今年1月與建造業議會合併，他轉任議會工人註冊總監。
梁無透露現職薪酬，副局長月薪183,350元。資料顯示建造業議會總監級職員年薪最少100萬元。